व्यवस्थापन शिक्षणात नवा टप्पा गाठत आयआयएम मुंबईने थेट पदवी स्तरावर डिजिटल सायन्स आणि बिझनेस मॅनेजमेंट या चार वर्षांच्या अभ्यासक्रमाची घोषणा केली आहे. डिजिटल अर्थव्यवस्था, तंत्रज्ञानाधारित उद्योग आणि बदलत्या नोकरी बाजाराच्या गरजा लक्षात घेऊन हा अभ्यासक्रम तयार करण्यात आला आहे.
या अभ्यासक्रमात पारंपरिक व्यवस्थापन विषयांसोबत आर्टिफिशियल इंटेलिजन्स, मशीन लर्निंग, डेटा सायन्स, आयओटी आणि रोबोटिक्स यांसारख्या आधुनिक तंत्रज्ञानाचे एकत्रित शिक्षण दिले जाणार आहे. उद्देश एकच — डिजिटल युगात सक्षम नेतृत्व घडवणे.
विद्यार्थ्यांना प्रत्यक्ष अनुभव मिळावा यासाठी इंटर्नशिप, लाईव्ह प्रोजेक्ट्स आणि उद्योग सहकार्यावर विशेष भर देण्यात आला आहे. यासाठी विविध औद्योगिक भागीदारांसोबत करार झाले असून, आंतरराष्ट्रीय शैक्षणिक सहकार्यासाठीही प्रयत्न सुरू आहेत.
राष्ट्रीय शिक्षण धोरणाशी सुसंगत असलेला हा अभ्यासक्रम भारतातील पदवी शिक्षणात आयआयएम मुंबईला आघाडीवर नेणारा ठरेल. यासाठी पुण्यात स्वतंत्र शैक्षणिक परिसर उभारण्यासही मान्यता देण्यात आली असून, आयआयएम मुंबईच्या विस्ताराला नवी दिशा मिळाली आहे.
Comments are closed.