बँकेत नोकरी करण्याची इच्छा असलेल्या तरुणांसाठी मोठी आणि आनंदाची बातमी समोर आली आहे. IDBI Bank ने १३०० पदांसाठी भरती प्रक्रिया जाहीर केली आहे. या भरती मोहिमेत ज्युनिअर असिस्टंट मॅनेजर आणि असिस्टंट मॅनेजर या पदांचा समावेश असून देशभरातील पात्र उमेदवारांकडून अर्ज मागविण्यात आले आहेत. इच्छुक उमेदवारांना ८ मार्च २०२६ पासून बँकेच्या अधिकृत वेबसाइट idbibank.in वर ऑनलाइन अर्ज करता येणार आहे, तर अर्ज करण्याची अंतिम तारीख १९ मार्च २०२६ निश्चित करण्यात आली आहे.
या भरती मोहिमेद्वारे ज्युनिअर असिस्टंट मॅनेजर पदाच्या ११०० जागा तर असिस्टंट मॅनेजर पदाच्या २०० जागा भरल्या जाणार आहेत. या दोन्ही पदांसाठी अर्ज करणाऱ्या उमेदवारांकडे मान्यताप्राप्त विद्यापीठातून कोणत्याही शाखेतील बॅचलर पदवी असणे आवश्यक आहे. बँकेने वयोमर्यादाही स्पष्ट केली असून ज्युनिअर असिस्टंट मॅनेजर (ग्रेड ओ – रीजनल) पदासाठी उमेदवारांचे वय २० ते २८ वर्षे असणे आवश्यक आहे. तर असिस्टंट मॅनेजर पदासाठी उमेदवारांचे वय २० ते २५ वर्षांच्या दरम्यान असावे लागेल. याशिवाय आरक्षित प्रवर्गातील उमेदवारांना सरकारी नियमांनुसार वयोमर्यादेत सवलत दिली जाणार आहे.
या भरतीसाठी उमेदवारांची निवड ऑनलाइन लेखी परीक्षा आणि मुलाखत या टप्प्यांतून केली जाणार आहे. लेखी परीक्षेत तार्किक क्षमता, गणित, इंग्रजी भाषा आणि सामान्य ज्ञान या विषयांवर आधारित प्रश्न विचारले जाणार आहेत. लेखी परीक्षा उत्तीर्ण झालेल्या उमेदवारांना पुढील टप्पा म्हणून मुलाखतीसाठी बोलावले जाईल. भरती प्रक्रियेबाबत अधिक माहिती, पात्रता आणि इतर तपशील जाणून घेण्यासाठी इच्छुक उमेदवारांनी नियमितपणे IDBI बँकेची अधिकृत वेबसाइट भेट देण्याचे आवाहन करण्यात आले आहे.
Comments are closed.