देशाच्या सुरक्षेसाठी योगदान देण्याची इच्छा बाळगणाऱ्या तरुण पदवीधारकांसाठी एक अत्यंत महत्त्वाची आणि आकर्षक भरती प्रक्रिया सुरू झाली आहे. इंटेलिजन्स ब्युरो (IB) अर्थात गुप्तचर विभागात असिस्टंट सेंट्रल इंटेलिजन्स ऑफिसर (ACIO) ग्रेड-I/एक्झिक्युटिव्ह पदांसाठी ३७१७ जागांची मेगाभरती जाहीर करण्यात आली आहे. ही भरती १९ जुलै २०२५ पासून सुरू झाली असून, २० ऑगस्ट २०२५ ही अंतिम मुदत आहे. सरकारी नोकरीसाठी तयार असलेल्या आणि देशसेवेसाठी उत्कट इच्छा असलेल्या उमेदवारांसाठी ही भरती म्हणजे एक सुवर्णसंधी आहे.
देशाच्या गुप्तचर यंत्रणेत प्रवेशाची संधी!
ही भरती केंद्रीय गृह मंत्रालयाच्या अखत्यारीतील इंटेलिजन्स ब्युरो (IB) मार्फत राबवली जात आहे. या योजनेतून निवड झालेल्या उमेदवारांना देशाच्या अंतर्गत सुरक्षेचा भाग बनण्याची संधी मिळणार आहे. ACIO हे पद केंद्र सरकारच्या संवेदनशील यंत्रणांमध्ये मानाचे पद मानले जाते. यामध्ये संशयित हालचालींचा शोध, सुरक्षा यंत्रणांना माहिती पुरविणे, देशविरोधी कारवायांवर लक्ष ठेवणे अशा जबाबदाऱ्या असतात.
एकूण जागांची माहिती आणि आरक्षणाचा तपशील
या भरतीअंतर्गत एकूण ३७१७ पदे भरली जाणार असून, त्याचे वर्गीकरण पुढीलप्रमाणे आहे:
- सर्वसाधारण (General): १५३७ पदे
- आर्थिकदृष्ट्या दुर्बल घटक (EWS): ४४२ पदे
- इतर मागासवर्गीय (OBC): ९४६ पदे
- अनुसूचित जाती (SC): ५६६ पदे
- अनुसूचित जमाती (ST): २२६ पदे
पात्रता आणि वयोमर्यादा – उमेदवार काय पाहिजे?
या पदांसाठी अर्ज करणाऱ्या उमेदवारांनी किमान पदवीधर असणे आवश्यक आहे. कोणत्याही मान्यताप्राप्त विद्यापीठातून कोणत्याही शाखेतील पदवी ग्राह्य धरली जाईल. संगणकाचे मूलभूत ज्ञानही अपेक्षित आहे.
वयाची मर्यादा: १८ ते २७ वर्षे पर्यंत, आणि १० ऑगस्ट २०२५ या तारखेआधारे वयाची गणना केली जाणार आहे. आरक्षित प्रवर्गातील उमेदवारांना केंद्र शासनाच्या नियमानुसार सवलत दिली जाईल.
अर्ज प्रक्रिया – घरबसल्या करा ऑनलाईन अर्ज!
IB भरतीसाठी अर्ज करण्यासाठी उमेदवारांनी गृह मंत्रालयाच्या अधिकृत वेबसाइट www.mha.gov.in वर जाऊन ‘Recruitment’ विभागात अर्ज भरायचा आहे. त्यासाठी प्रथम नोंदणी करून लॉगिन करावे लागेल. नंतर अर्जात संपूर्ण माहिती भरून आवश्यक कागदपत्रे अपलोड करावी लागतील आणि अर्ज शुल्क भरावे लागेल. अर्ज सबमिट केल्यानंतर त्याची प्रत सेव्ह करून प्रिंटआउट काढणे आवश्यक आहे.
अर्ज शुल्क आणि सवलती – कोणासाठी किती?
- OPEN, EWS, OBC (पुरुष) उमेदवारांसाठी – ₹650
- SC, ST, महिला आणि इतर सर्वांसाठी – ₹550
हे शुल्क ऑनलाइन मोडद्वारे भरावे लागेल.
निवड प्रक्रिया – तीन टप्प्यांतील चाचण्या
उमेदवारांची निवड तीन टप्प्यांतून केली जाईल:
- वस्तुनिष्ठ परीक्षा (Objective Test – 100 गुण): 60 मिनिटांची चाचणी, सामान्य ज्ञान, गणित, तार्किक क्षमता, इंग्रजी व सामान्य अध्ययन या विषयांवर आधारित प्रश्न.
- वर्णनात्मक परीक्षा (Descriptive Test – 50 गुण): निबंध लेखन (30 गुण) आणि इंग्रजी आकलन व सारांश लेखन (20 गुण).
- मुलाखत (Interview – 100 गुण): लेखी परीक्षेत उत्तीर्ण झालेल्यांची व्यक्तिमत्व व पात्रतेवर आधारित मुलाखत घेतली जाईल.
देशसेवेसाठी सज्ज आहात का?
देशाच्या गुप्तचर विभागात नोकरी ही केवळ एक सरकारी पद नाही, तर एक जबाबदारी, शौर्य आणि विश्वासाचा मानचिन्ह आहे. तरुणांना जर देशासाठी काही करायची तीव्र इच्छा असेल, तर ही संधी दवडू नये. भरतीबाबत अधिक माहिती आणि अद्ययावत अधिसूचना www.mha.gov.in वर नियमित पाहाव्यात. वेळेवर अर्ज करा आणि देशसेवेसाठी सज्ज व्हा!
Comments are closed.