पुणे जिल्हा परिषदेमधून ‘आरोग्य सेवक (५० टक्के पुरुष)’ संवर्गासाठी १२८ उमेदवारांची निवड मार्च २०२५ मध्ये झाली होती. सर्वांची कागदपत्र पडताळणीही त्या वेळी पार पडली. पण नियमानुसार लवकरच नियुक्तीपत्र मिळायला हवं होतं, ते मात्र अजूनही नाही मिळालं. चार महिने उलटले तरी जिल्हा परिषदीनं नियुक्तीचा मुहूर्तही ठरवलेला नाही, त्यामुळे निवड झालेल्या उमेदवारांमध्ये नाराजीचं वातावरण आहे.
चार महिने उलटले… तरी अद्याप वाटच!
जुलै २०२४ मध्ये परीक्षा घेण्यात आली होती, त्यानंतर तात्पुरती यादी जाहीर झाली आणि मार्च २०२५ मध्ये पडताळणी झाली. तरीसुद्धा नियुक्तीपत्रांसाठी मुलं वाट बघतायत. ही दोन वर्षांची निवड प्रक्रिया पार केल्यानंतर उमेदवारांना आजही प्रतिक्षा करावी लागते, हे शासनाच्या व्यवस्थापनावर गंभीर प्रश्नचिन्ह निर्माण करतंय.
इतर संवर्गांना नोकरी, मग आम्हालाच का थांबवणं?
विशेष म्हणजे, इतर संवर्गातील निवड झालेल्या उमेदवारांना नियुक्तीपत्र मिळालं असून, ते सेवेत रुजूही झाले आहेत. मग ‘आरोग्य सेवक ५० टक्के पुरुष’ संवर्गासाठी हीच प्रक्रिया का रखडते? असा सवाल उमेदवार उपस्थित करत आहेत. प्रशासनाचा हा दुजाभाव उमेदवारांना मानसिक त्रास देतोय.
“निवड झालो, पण घरच्यांना काय उत्तर द्यायचं?”
एका विद्यार्थ्यानं सांगितलं, “आम्ही रात्रंदिवस अभ्यास करून निवड मिळवली. घरची परिस्थिती हलाखीची आहे. ही नोकरी लागली असती, तर कुटुंबाला आधार मिळाला असता. पण चार महिन्यांपासून आम्ही फक्त प्रतीक्षेत आहोत. आता तर पगारही बुडत चाललाय.” अशा भावना व्यक्त करताना त्याच्या डोळ्यांतली हतबलता स्पष्ट जाणवते.
निवेदनं दिली, मंत्री भेटले, तरी आश्वासनांचं गुऱ्हाळ!
या संदर्भात अनेक उमेदवारांनी पालकमंत्री आणि ग्रामविकासमंत्री यांच्याकडेही निवेदनं दिली, पण त्यातून केवळ आश्वासनं मिळत आहेत. कोणत्याच अधिकाऱ्यांकडून स्पष्ट वेळापत्रक मिळालेलं नाही. हे संपूर्ण प्रकरण विद्यार्थ्यांच्या मनात शासनाच्या कामकाजाबद्दल अविश्वास निर्माण करतंय.
नियुक्तीपत्रासाठी मुहूर्त का लागतोय?
उमेदवार असा प्रश्न विचारतात की, “नियुक्तीपत्र देण्यासाठी जिल्हा परिषदेच्या पंचांगात मुहूर्त बघितला जातोय का?” दोन वर्षांची प्रक्रिया पार करूनही अंतिम टप्प्यावर येऊन नियुक्ती रखडणं, ही बाब सर्वसामान्यांच्या प्रशासनावर असलेल्या विश्वासाला तडा देणारी आहे.
प्रशासनाचं उत्तर – पुढच्या आठवड्यात पत्र!
जिल्हा परिषदेचे उपमुख्य कार्यकारी अधिकारी श्रीकांत खरात यांनी सांगितलं की, “आरोग्य सेवक ५० टक्के पुरुष संवर्गासाठी नियुक्तीपत्र अंतिम टप्प्यात असून, पुढच्या आठवड्यात देण्यात येणार आहे.” मात्र, याआधीही असेच आश्वासने मिळाल्यामुळे उमेदवारांमध्ये संभ्रमाची स्थिती आहे.
उमेदवारांची मागणी – तातडीने नियुक्ती द्या!
या रखडलेल्या प्रक्रियेमुळे उमेदवारांना मानसिक, आर्थिक आणि कौटुंबिक त्रास सहन करावा लागतोय. त्यामुळे प्रशासनाने याकडे गांभीर्यानं लक्ष द्यावं आणि नियुक्तीपत्रे त्वरीत देऊन उमेदवारांना सेवेत सामावून घ्यावं, ही त्यांची एकमुखी मागणी आहे.
Comments are closed.