आजच्या स्पर्धात्मक जॉब मार्केटमध्ये एक धक्कादायक ट्रेंड समोर आला आहे—Ghost Hiring म्हणजेच बनावट नोकरी भरती. 2024 मध्ये भारतातील अनेक मोठ्या कंपन्यांनी नोकरीच्या खोट्या जाहिराती दिल्याचे उघड झाले असून, त्यामुळे नोकरी शोधणाऱ्या उमेदवारांना मोठा फटका बसत आहे. CNBC च्या अहवालानुसार, दहा पैकी चार कंपन्या या प्रकारात सहभागी असल्याचे समोर आले आहे, तर अजूनही अनेक कंपन्या केवळ दिखाव्यासाठी रिक्त पदांची जाहिरात करत आहेत.
नोकरीच्या शोधात असलेले उमेदवार जाहिरात पाहून अर्ज करतात, पण त्यांना कोणताही प्रतिसाद मिळत नाही. जाहिरात आणि प्रत्यक्ष भरती यातील या तफावतीमुळे अनेक जण संभ्रमात पडले आहेत. त्यामुळे आता हा प्रश्न उपस्थित होतो की, या जाहिराती खऱ्या आहेत की फक्त दिखावा?
तज्ञांच्या मते, कंपन्या अशा बनावट जाहिराती अनेक कारणांसाठी देतात. त्यामध्ये भविष्यातील भरतीसाठी उमेदवारांचा डेटा गोळा करणे (Talent Pipeline), कंपनी वाढत असल्याचा संदेश गुंतवणूकदारांना देणे, तसेच मार्केटमधील ट्रेंड आणि कौशल्यांची माहिती मिळवणे (Data Mapping) यांचा समावेश होतो.
मग अशी ‘Ghost Job’ ओळखायची कशी?
जर एखादी नोकरी जाहिरात खूप काळापासून वारंवार दिसत असेल, पण भरती होत नसेल, तर ती संशयास्पद ठरू शकते. तसेच, जर नोकरी LinkedIn किंवा इतर जॉब पोर्टलवर दिसत असेल पण कंपनीच्या अधिकृत वेबसाइटवर नसेल, तर सावध राहा. अशावेळी थेट HR किंवा Hiring Manager शी संपर्क साधून खात्री करून घेणे आवश्यक आहे.
एकूणच, नोकरी शोधताना केवळ जाहिरातींवर विश्वास ठेवू नका, तर त्याची पडताळणी करूनच पुढे जा. सावधगिरी बाळगली तरच या बनावट भरतीच्या जाळ्यात अडकण्यापासून बचाव होऊ शकतो.
Comments are closed.