महाराष्ट्र राज्यातील बांधकाम कामगारांसाठी आनंदाची बातमी! महाराष्ट्र इमारत आणि इतर बांधकाम कामगार कल्याणकारी मंडळाने १३ फेब्रुवारी २०२४ रोजी मोफत भांडी संच योजनेची सुरुवात केली आहे. या योजनेचा मुख्य उद्देश बांधकाम कामगारांना आर्थिक सहाय्य देऊन त्यांचे स्वयंपाक आणि घरगुती काम सोपे करणे आहे. कामगारांसाठी ही योजना अत्यंत उपयुक्त असून, त्यांना घरगुती भांड्यांचा संपूर्ण संच मोफत मिळणार आहे.
योजनेचा लाभ घेण्यासाठी कामगारांना काही अटी पूर्ण करणे आवश्यक आहे. अर्जदार महाराष्ट्र इमारत व बांधकाम कामगार मंडळात नोंदणीकृत असावा लागतो. तसेच त्यांच्याकडे सक्रिय (Active) बांधकाम कामगार कार्ड आणि स्मार्ट कार्ड असणे गरजेचे आहे. यामुळे फक्त पात्र कामगार योजनेचा लाभ घेऊ शकतात.
या योजनेअंतर्गत प्रत्येक पात्र कामगाराला ३० गृह उपयोगी वस्तूंचा संच मोफत प्रदान केला जाणार आहे. या वस्तूंचा बाजारभाव साधारण १५,००० ते ३०,००० रुपयांपर्यंत असतो. सरकारने हा संच पूर्णपणे मोफत पुरवण्याचा निर्णय घेतला असून, कोणत्याही एजंट किंवा मध्यस्थाकडून पैसे देण्याची आवश्यकता नाही.
योजनेअंतर्गत मिळणाऱ्या वस्तूंची यादीही ठळक आहे. यात ताट, वाट्या, पाण्याचे ग्लास, झाकणासह पातेले, भातवाडी, मोठा चमचा, २ लिटर पाण्याचे जग, मसाल्याचा डब्बा, तीन डब्यांचा सेट, परात, ५ लिटर स्टील कुकर, स्टील कढई आणि झाकणासह स्टीलची पाण्याची टीप यांचा समावेश आहे. या सर्व वस्तूंचा एकत्रित संच ३० वस्तूंचा आहे.
मोफत भांडी संच योजनेसाठी अर्ज करताना काही आवश्यक कागदपत्रे जवळ ठेवणे गरजेचे आहे. यामध्ये आधार कार्ड, कामगाराचे नोंदणी प्रमाणपत्र, रेशन कार्ड, रहिवासी प्रमाणपत्र, वार्षिक उत्पन्न दाखला, ९० दिवसांचे कामाचे प्रमाणपत्र, हमीपत्र आणि पासपोर्ट साईज फोटो आवश्यक आहेत.
अर्ज करण्याची प्रक्रिया अत्यंत सोपी आहे. कामगार मंडळाच्या अधिकृत वेबसाइटवर जाऊन “Workers Registration” या पर्यायावर क्लिक करून अर्ज भरणे आवश्यक आहे. येथे वैयक्तिक माहिती, मोबाईल नंबर, आधार क्रमांक आणि पत्ता यांसारखी माहिती भरावी लागते. त्यानंतर आवश्यक कागदपत्रे स्कॅन करून अपलोड करावी लागतात.
सर्व माहिती तपासल्यानंतर अर्ज सबमिट करावा लागतो. अर्ज मंजूर झाल्यानंतरच कामगारांना मोफत भांडी संच प्राप्त होतो. सध्या काही जिल्ह्यांमध्ये भांडी वाटप सुरू आहे, त्यामुळे जिल्हा बांधकाम कामगार सुविधा केंद्रात चौकशी करणे फायदेशीर ठरेल.
ही योजना कामगारांसाठी केवळ आर्थिक सहाय्य नाही, तर त्यांच्या घरगुती जीवनातील सुविधा वाढवणारी एक महत्वाची पावलं आहे. यामुळे कामगारांना दिवाळीपूर्वी मोठा आनंद मिळणार आहे, तसेच त्यांच्या कुटुंबाचे जीवनमान सुधारण्यासही मदत होईल.
Comments are closed.