विझोरा, बार्शीटाकळी तालुका: तालुक्यातील चार पशुवैद्यकीय दवाखान्यांमध्ये कायमस्वरूपी डॉक्टर नसल्यामुळे पशुपालक मोठ्या अडचणीत आहेत. लम्पी त्वचारोगासह इतर आजारांचे प्रमाण वाढत असताना जनावरांना वेळेवर उपचार मिळत नसल्याने शेतकऱ्यांमध्ये नाराजी पसरली आहे.
गोरव्हा, धाबा, कान्हेरी सरप व टिटवा येथील पशुवैद्यकीय दवाखान्यांतील पदे अनेक दिवस रिक्त असल्यामुळे कार्यभार शेजारच्या केंद्रांतील पशुवैद्य अधिकाऱ्यांकडे सोपविण्यात आला आहे. एका अधिकाऱ्याला दोन ठिकाणी सेवा देणे कठीण ठरत असल्यामुळे अधिकारी त्रस्त आहेत, तर शेतकऱ्यांना उपचारासाठी दीर्घ प्रतीक्षा करावी लागते.
लम्पी आजाराच्या साथीच्या काळात आणि हिवाळ्यातील लसीकरण मोसमात पशुवैद्यकीय उपलब्ध नसल्यामुळे शेतकऱ्यांना जनावरांच्या आरोग्याबाबत गंभीर अडचणी निर्माण झाल्या आहेत. अनेकांना खासगी डॉक्टरांकडे जाऊन महागडे उपचार करावे लागत आहेत, ज्यामुळे आर्थिक ताण वाढला आहे.
शेतकऱ्यांचे म्हणणे आहे की, पशुसंवर्धन विभागातील निष्काळजीमुळे तालुक्यातील पशुवैद्यकीय सेवा ठप्प झाल्या आहेत. रिक्त पदे तातडीने भरण्यात यावी आणि जनावरांच्या उपचारांची सुविधा सुरळीत करण्यात यावी.
Comments are closed.