नाशिक जिल्ह्यातील बोगस शालार्थ आयडी घोटाळ्यानंतर स्थापन झालेल्या विशेष तपास पथकाने (SIT) चौकशीचा वेग वाढवला आहे. आतापर्यंत जिल्ह्यातील तब्बल १४ शिक्षण संस्थांची तपासणी पूर्ण झाली असून ही चौकशी अजूनही सुरूच आहे. या प्रकरणी ६९ जणांवर गुन्हे दाखल झाल्यामुळे शिक्षण संस्थांमध्ये आणि विभागातील अधिकाऱ्यांमध्ये मोठी खळबळ उडाली आहे.
या तपासणीसाठी पुणे विभागीय महसूल आयुक्तांच्या अध्यक्षतेखाली सहा सदस्यीय एसआयटी कार्यरत आहे. शिक्षक मान्यता, शालार्थ आयडी, रुजू अहवाल, तसेच शिक्षक भरतीतील अनियमितता यांची बारकाईने छाननी केली जात असून, अनेक नवे तपशील उघड होत आहेत. बोगस भरतीची अधिक प्रकरणे समोर येत असल्याने एसआयटीचा मुक्काम नाशिकमध्ये वाढवण्यात आला आहे.
बोगस शालार्थ आयडी तयार करून शासनाची फसवणूक केल्याच्या गंभीर प्रकारामुळे आधीच तीन शिक्षणाधिकारी आणि दोन कर्मचारी यांच्यावर कारवाई झाली आहे. आता तपास पुढे जाताना अनेक नवीन नावे आणि संस्थांची माहिती समोर येत आहे. या चौकशीमुळे जिल्ह्यातील सर्वच शिक्षण संस्थांमध्ये आणि अधिकाऱ्यांमध्ये धास्तीचे वातावरण निर्माण झाले आहे.
यापूर्वी वरिष्ठ अधिकाऱ्यांनी तयार केलेल्या अहवालातून समाधानकारक माहिती न मिळाल्यानेच अखेर ही चौकशी एसआयटीकडे वर्ग करण्यात आली. आता सुरू असलेल्या कठोर तपासणीमुळे बोगस भरतीचा संपूर्ण फुलारा उघडकीस येणार, अशी चर्चा जिल्ह्यात आहे.
Comments are closed.