राज्य सरकारची आर्थिक परिस्थिती सुधारल्यानंतर मुख्यमंत्री माझी लाडकी बहीण योजनेतील लाभार्थ्यांना वाढीव मदत देण्यात येईल, असे उपमुख्यमंत्री अजित पवार यांनी विधानसभेत स्पष्ट केले. त्यामुळे लाभार्थींना २१०० रुपयांच्या मदतीसाठी प्रतीक्षा करावी लागणार आहे.
लॉटरीसाठी समितीची स्थापना
राज्याचे उत्पन्न वाढवण्यासाठी लॉटरी प्रणालीचा वापर करण्याचा विचार आहे. यासंदर्भात सर्वपक्षीय आमदारांची समिती स्थापन करण्याची घोषणा अजित पवार यांनी विधानसभेत केली. ही समिती महिनाभरात अहवाल सादर करेल.
अर्थसंकल्पातील अनुदान मंजूर
२०२५-२६ च्या अर्थसंकल्पातील वित्त, नियोजन, अन्न आणि नागरी पुरवठा विभागाच्या अनुदानाच्या मागण्या मंजूर करण्यात आल्या. सरकार आर्थिक नियोजनावर भर देत असल्याचे पवार यांनी स्पष्ट केले.
लाडकी बहीण योजनेबाबत सरकारची भूमिका
सरकारने दिलेल्या आश्वासनांप्रमाणे लाभार्थ्यांना मदत केली जात आहे. मात्र, अर्थस्थिती सुधारल्यानंतरच वाढीव मदत दिली जाईल, असे पवार म्हणाले.
राज्याच्या उत्पन्नात सुधारणा करण्याचा प्रयत्न
राज्याचे स्थूल उत्पन्न ४९ लाख ३९ हजार कोटी रुपये असून, महसुली तूट १ टक्क्याच्या आत आहे. त्यामुळे १०० टक्के महसूल वसूल करून आर्थिक शिस्त आणण्यावर भर दिला जात आहे.
अनुदानाच्या खर्चाबाबत खुलासा
अजित पवार यांनी काँग्रेस नेते नाना पटोले यांनी केलेला ४० टक्के खर्च झाल्याचा दावा खोडून काढत ७७.२६ टक्के खर्च झाल्याचे स्पष्ट केले.
