उपजिल्हा आणि ग्रामीण रुग्णालयांमध्ये डॉक्टरांची मोठी टंचाई निर्माण झाली आहे. एकूण १२३ मंजूर पदांपैकी फक्त ६१ पदं भरलेली आहेत, तर तब्बल ५०% पदं रिक्तच पडली आहेत! सध्या ३१ कंत्राटी डॉक्टरांवर रुग्णालयं चालवली जात आहेत. परिणामी, गंभीर अपघातग्रस्त किंवा जास्त त्रास असलेल्या रुग्णांना अजूनही चंद्रपूरला रेफर करावं लागतं, हे मोठं दुर्दैव आहे.
चार मोठी उपजिल्हा रुग्णालयं वगळता सर्वत्र मोठी डॉक्टर टंचाई!
चिमूर, वरोरा, राजुरा आणि ब्रम्हपुरी ही चार मोठी उपजिल्हा रुग्णालयं वगळता इतर ग्रामीण रुग्णालयांमध्ये डॉक्टरांची मोठी कमतरता आहे. नागभीड, सिंदेवाही आणि सावली इथं तर फक्त कंत्राटी डॉक्टरांच्या भरोशावर आरोग्यसेवा सुरू आहे.
१२३ मंजूर पदं, पण ६२ पदं रिकामी!
चंद्रपूर जिल्ह्यात १४ तालुक्यांमध्ये ग्रामीण रुग्णालयं आहेत. सरकारने मंजूर केलेल्या १२३ पदांपैकी फक्त ६१ भरली आहेत, म्हणजे तब्बल ६२ पदं अजूनही रिकामी. औद्योगिकदृष्ट्या महत्त्वाच्या असलेल्या चंद्रपूर जिल्ह्यात ही परिस्थिती चिंताजनक आहे.
- चिमूर: १२ मंजूर पदं – सर्व भरलेली
- वरोरा: १२ मंजूर पदं – ११ भरलेली
- राजुरा: ६ मंजूर पदं – सर्व भरलेली
- ब्रम्हपुरी: सर्व पदं भरलेली
- नागभीड, सिंदेवाही, सावली: फक्त कंत्राटी डॉक्टर उपलब्ध
- गोंडपिंपरी: ३ मंजूर पदांपैकी फक्त १ कंत्राटी डॉक्टर
- बल्लारपूर: ३ मंजूर पदांपैकी फक्त १ कायम डॉक्टर, २ कंत्राटी
- कोरपना, पोंभूर्णा, जिवती: येथे कायमस्वरूपी डॉक्टर नाहीत!
पती-पत्नी डॉक्टरांचा बदली वाद आणि राजकीय हस्तक्षेप
मूल येथे पती-पत्नी डॉक्टर कार्यरत होते, मात्र पतीची बदली झाल्यानंतर पत्नीचीही बदली झाली. पण ती अजूनही नवीन ठिकाणी रुजू होऊ शकलेली नाही. विशेष म्हणजे पालकमंत्र्यांनीच अधिकाऱ्यांवर दबाव टाकला असल्याची चर्चा आहे!
कंत्राटी डॉक्टरांच्या भरोशावर आरोग्यसेवा!
गडचांदूर येथे ३ मंजूर पदं आहेत, पण तिथेही फक्त कंत्राटी डॉक्टरांवरच काम सुरू आहे. ग्रामीण भागातील आरोग्य सेवा दिवसेंदिवस ढासळत आहे, पण पदं भरली जात नाहीत. त्यामुळे गंभीर रुग्णांना अजूनही मोठ्या शहरात हलवावं लागतं, ही मोठी शोकांतिका आहे.
सरकार आणि प्रशासन यावर काय तोडगा काढणार? हा मोठा प्रश्न आहे!
Comments are closed.