केंद्रीय माध्यमिक शिक्षण मंडळ (CBSE) तर्फे सेंट्रल टीचर एलिजिबिलिटी टेस्ट (CTET) फेब्रुवारी 2026 साठीची अर्ज प्रक्रिया अधिकृतपणे सुरू झाली आहे. 8 फेब्रुवारी 2026 रोजी देशभरातील विविध केंद्रांवर ही परीक्षा होणार असून, इच्छुक उमेदवार 18 डिसेंबर 2025 पर्यंत ऑनलाइन अर्ज करू शकतात. शिक्षक भरतीत TET उत्तीर्ण होणे अनिवार्य केल्याने उमेदवारांची संख्या मोठ्या प्रमाणात वाढण्याची शक्यता व्यक्त केली जात आहे.
सर्वोच्च न्यायालयाच्या अलीकडील निर्णयानंतर देशातील सर्व शिक्षकांसाठी TET उत्तीर्ण होणे बंधनकारक झाले आहे. महाराष्ट्रात नुकतीच घेतलेल्या राज्य TET परीक्षेत मोठ्या प्रमाणात उमेदवार सहभागी झाले होते. जवळपास 4.75 लाख उमेदवारांनी परीक्षा दिली. त्याच पार्श्वभूमीवर आता CTET फेब्रुवारी 2026 साठीही अर्जदारांची संख्या वाढण्याची दाट शक्यता आहे.
या परीक्षेसाठीची अर्ज प्रक्रिया 27 नोव्हेंबरपासून सुरू झाली असून, 18 डिसेंबरपर्यंत ctet.nic.in या अधिकृत संकेतस्थळावरून ऑनलाइन अर्ज स्वीकारले जाणार आहेत. ऑनलाइन फॉर्मसोबतच नियोजित शुल्कही पोर्टलवर भरता येईल. CBSE ने यंदा प्रक्रियेत कोणताही बदल केलेला नाही, त्यामुळे उमेदवारांना अर्ज सुलभपणे पूर्ण करता येणार आहे.
फी संरचना देखील यापूर्वीप्रमाणेच आहे. सर्वसाधारण प्रवर्गातील उमेदवारांना —
- पेपर I साठी ₹1000
- दोन्ही पेपरसाठी ₹1200
तर SC/ST उमेदवारांना — - पेपर I साठी ₹500
- दोन्ही पेपरसाठी ₹600 शुल्क भरावे लागेल.
CTET परीक्षा देशभरातील प्रमुख शहरांमध्ये घेण्यात येते. फेब्रुवारी 2026 परीक्षेचे वेळापत्रक देखील जाहीर झाले आहे. पेपर II सकाळी 9:30 ते 12:00, तर पेपर I दुपारी 2:30 ते 5:00 या वेळेत घेण्यात येणार आहे. उमेदवारांनी वेळेआधी परीक्षा केंद्रावर उपस्थित राहणे बंधनकारक आहे.
इच्छुक उमेदवारांनी लवकरात लवकर अधिकृत संकेतस्थळावर जाऊन आपले अर्ज भरावेत, कारण शेवटच्या क्षणी सर्व्हरवर ताण येण्याची शक्यता असते. शिक्षक भरतीची तयारी करणाऱ्या विद्यार्थ्यांसाठी ही परीक्षा अतिशय महत्त्वाची असून, आगामी भरती प्रक्रियेत CTET गुणांना विशेष महत्त्व मिळू शकते.
Comments are closed.