‘लाडकी बहीण’ योजनेतले एकेक भानगडी आता एकेक करून बाहेर येऊ लागल्यात. ‘लोकमत’नं आधीच उघड केलं होतं की १४ हजारांपेक्षा जास्त पुरूषांनी ही योजना गिळली, पण आता तर थेट ९,५२६ राज्य सरकारी महिला कर्मचाऱ्यांनीसुद्धा या योजनेचा गैरफायदा घेतल्याचं दिसून आलंय!
आश्चर्य म्हणजे, ज्या महिला आधीच सेवानिवृत्त होऊन पेन्शन घेतायत, त्याच महिलांच्या खात्यात ‘लाडकी बहीण’चे दर महिन्याचे १,५०० रुपयेही जमा होत होते! ह्या योजनेत काय सुरू आहे, हे पाहून सामान्य माणूस हादरून जाईल.
सरकारनं पुरुष लाभार्थ्यांची माहिती मिळवायला रेशन कार्डाचा आधार घेतला होता. पण आता सरकारी बायका कर्मचाऱ्यांची छाननी ‘सेवार्थ प्रणाली’तून केली, तेव्हा ही सगळी हेराफेरी लक्षात आली.
काही जण तर असे आहेत की, त्यांना आधीच इंदिरा गांधी पेन्शन योजना मिळते, तरीसुद्धा ते ‘लाडकी बहीण’ योजनेचे पैसे घेत होते. १० महिन्यांत त्यांनी २० कोटी रुपये गिळले!
कारवाईचं नाव नाहीच!
३० मे २०२५ रोजी ‘लोकमत’नं बातमी दिली होती की २,६५२ महिला सरकारी कर्मचाऱ्यांनी ही योजना लाटली. प्रत्येकी १३,५०० अशा पद्धतीनं ९ महिन्यांत तब्बल ३ कोटी ५८ लाख रुपये गेले. पण अजूनपर्यंत कुणावरही कारवाई झालेली नाही.
निवृत्त खात्यांमध्ये कोट्यवधींचा ओघ!
निवृत्त झालेल्या १,२३२ महिला कर्मचाऱ्यांच्या खात्यात या योजनेचे पैसे ८ ते १० महिने टाकले गेले. यामुळे एकूण १ कोटी ८५ लाख रुपये त्यांच्या खात्यात गेले.
आता सेवेत असलेल्या ८,२९४ महिला कर्मचाऱ्यांनी सुद्धा दरमहा १ कोटी २४ लाख रुपये घेतल्याचं समोर आलंय. हेही ८-१० महिन्यांपर्यंत सुरू होतं. यामुळे सुमारे १२ कोटींचा गैरव्यवहार झालाय. या सगळ्या महिला बहुतेकशा वर्ग तीन किंवा वर्ग चारच्या आहेत.
Comments are closed.