देशात पुढील वर्षी सुरू होणारी जनगणना यावेळी पूर्णपणे आधुनिक पद्धतीने, अद्ययावत मोबाइल अॅपद्वारे करण्यात येणार आहे. Census of India अंतर्गत होणाऱ्या या प्रक्रियेसाठी प्रगणक आणि पर्यवेक्षकांची नियुक्ती करण्यात येणार असून, त्यांच्या मोबाइलमध्ये विशेष अॅप डाऊनलोड करूनच सर्व नोंदणी केली जाणार आहे.
या जनगणनेच्या पहिल्या टप्प्यात, म्हणजे घरांची यादी (हाउस लिस्टिंग) तयार करण्याचे काम Pune जिल्ह्यात १६ मे ते १५ जूनदरम्यान राबवले जाणार आहे. यासाठी आवश्यक मनुष्यबळ उपलब्ध करून देण्याचे आदेश सरकारकडून देण्यात आले असून, पूर्वतयारीचा भाग म्हणून जिल्हाधिकारी कार्यालयात आढावा बैठक घेण्यात आली.
ही बैठक निवासी उपजिल्हाधिकारी व जिल्हा जनगणना अधिकारी ज्योती कदम यांच्या अध्यक्षतेखाली व्हिडिओ कॉन्फरन्सिंगद्वारे पार पडली. यामध्ये तहसीलदार, कँटोन्मेंट बोर्ड, नगरपंचायत, नगरपरिषद आणि महानगरपालिकांचे वरिष्ठ अधिकारी सहभागी झाले होते.
सूचनांनुसार, साधारण ७०० ते ८०० लोकसंख्या किंवा १८० ते २०० घरांचा एक ब्लॉक तयार केला जाईल. प्रत्येक ब्लॉकसाठी एक प्रगणक आणि सहा प्रगणकांमागे एक पर्यवेक्षक नेमण्यात येणार आहे. सर्व प्रगणकांच्या मोबाइलमध्ये जनगणनेचे अॅप उपलब्ध करून देण्यात येईल, ज्याद्वारे घरांची व ब्लॉकची यादी डिजिटल स्वरूपात तयार केली जाईल.
बैठकीत जनगणनेदरम्यान डिजिटल साधनांचा प्रभावी वापर, कर्मचाऱ्यांचे प्रशिक्षण, तांत्रिक अडचणींचे तातडीने निराकरण आणि विविध विभागांमधील समन्वय या मुद्द्यांवर सविस्तर चर्चा करण्यात आली. आगामी जनगणना अधिक अचूक, वेगवान आणि पारदर्शक व्हावी, हा यामागील मुख्य उद्देश असल्याचे प्रशासनाने स्पष्ट केले.
Comments are closed.