विद्यार्थ्यांसाठी आणि पालकांसाठी दिलासा देणारी आनंदवार्ता समोर आली आहे! महाराष्ट्रातील सीबीएसई संलग्न शाळांच्या दिवाळी सुट्ट्यांमध्ये अखेर वाढ करण्यात आली आहे. शिक्षण उपसंचालक माधुरी सावरकर यांनी १५ सप्टेंबर २०२५ रोजी निर्गमित केलेल्या परिपत्रकानुसार सर्व शाळांना १ नोव्हेंबरपर्यंत सुट्ट्या देण्याचे स्पष्ट आदेश दिले आहेत.
यावर्षी काही खासगी शाळांनी केवळ २८ ऑक्टोबरपर्यंतच दिवाळी सुट्ट्या जाहीर केल्यामुळे विद्यार्थ्यांमध्ये आणि पालकांमध्ये नाराजी होती. “दिवाळीसारख्या मोठ्या सणात विद्यार्थ्यांना पुरेशी सुट्टी मिळाली पाहिजे,” अशी मागणी सीबीएसई स्कूल स्टाफ वेल्फेअर असोसिएशन (CISWA) तर्फे करण्यात आली होती. यावर शिक्षण विभागाने तातडीने दखल घेत कठोर निर्देश जारी केले.
माधुरी सावरकर यांनी संबंधित शाळांना इशारा दिला की, जर १५ सप्टेंबरच्या परिपत्रकाचे पालन केले गेले नाही, तर त्या शाळांविरुद्ध कठोर कारवाई केली जाईल. तसेच विभागीय शिक्षण कार्यालयाकडून सर्व जिल्ह्यांना याबाबत सूचना पाठवण्यात आल्या आहेत.
नव्या आदेशानुसार,
- दिवाळी सुट्ट्या – १८ ऑक्टोबर ते १ नोव्हेंबर
- ख्रिसमस सुट्ट्या – २२ डिसेंबर ते २५ डिसेंबर
- उन्हाळी सुट्ट्या – २५ एप्रिलनंतर ते १४ जूनपर्यंत असणार आहेत.
त्यामुळे, सर्व सीबीएसई शाळा आता ३ नोव्हेंबरपासून नियमित सुरू होतील. शाळांनी पालकांना यासंदर्भात मेसेज व सूचना देण्यासही सुरुवात केली आहे.
या निर्णयामुळे विद्यार्थ्यांना विश्रांती घेऊन सण साजरा करण्याची संधी मिळणार असून, शिक्षकांनाही परीक्षेपूर्व नियोजनासाठी थोडा अधिक वेळ उपलब्ध होईल. शिक्षण विभागाने स्पष्ट केले आहे की, “शालेय सणांच्या सुट्ट्या विद्यार्थ्यांच्या मानसिक आरोग्य आणि कौटुंबिक वेळेसाठी आवश्यक आहेत, आणि त्यात कोणतीही कपात सहन केली जाणार नाही.”
Comments are closed.