परदेशात शिक्षण घेणाऱ्या भारतीय विद्यार्थ्यांसाठी महत्त्वाची बातमी समोर आली आहे. Central Board of Secondary Education (CBSE) ने मध्य पूर्वेतील युद्धजन्य परिस्थितीच्या पार्श्वभूमीवर २ मार्च २०२६ रोजी होणाऱ्या दहावी आणि बारावीच्या परीक्षा पुढे ढकलण्याचा निर्णय घेतला आहे. बहरीन, इराण, कुवेत, ओमान, कतार, सौदी अरेबिया आणि संयुक्त अरब अमिरात (यूएई) येथील सीबीएसई संलग्न शाळांसाठी खबरदारीचा उपाय म्हणून हा निर्णय घेण्यात आला आहे.
मंडळाने स्पष्ट केले आहे की ५ मार्चनंतरच्या परीक्षांबाबतचा अंतिम निर्णय ३ मार्च रोजी होणाऱ्या आढावा बैठकीनंतर जाहीर केला जाईल. सुधारित वेळापत्रक लवकरच जाहीर करण्यात येणार असून संबंधित शाळांमार्फत विद्यार्थ्यांना अधिकृत माहिती दिली जाईल. विशेष म्हणजे २ मार्च रोजीच्या परीक्षा रद्द करण्यात आलेल्या नसून केवळ पुढे ढकलण्यात आल्या आहेत.
विद्यार्थ्यांच्या सुरक्षेला सर्वोच्च प्राधान्य देत हा निर्णय घेण्यात आल्याचे मंडळाने नमूद केले आहे. संवेदनशील परिस्थितीमुळे विद्यार्थ्यांनी घाबरू नये, नियमित तयारी सुरू ठेवावी आणि कोणत्याही अफवांवर विश्वास ठेवू नये, असे आवाहन करण्यात आले आहे. पालक आणि विद्यार्थ्यांनी केवळ अधिकृत घोषणांवरच अवलंबून राहावे, असेही स्पष्ट करण्यात आले आहे. विद्यार्थ्यांचे शैक्षणिक भविष्य सुरक्षित राहावे यासाठी मंडळ सतर्क असल्याचा विश्वास यावेळी व्यक्त करण्यात आला.
Comments are closed.