केंद्रीय माध्यमिक शिक्षण मंडळाने (CBSE) आज दहावीच्या परीक्षेचा निकाल जाहीर केला आहे. फेब्रुवारी आणि मार्च २०२५ मध्ये झालेल्या परीक्षेचा निकाल आज, १३ मे रोजी ऑनलाईन प्रसिद्ध करण्यात आला. यंदाच्या निकालात एकूण ९३.६६ टक्के विद्यार्थी उत्तीर्ण झाले आहेत. हा निकाल नेहमीपेक्षा १० दिवस आधीच जाहीर झाल्याने विद्यार्थ्यांमध्ये आणि पालकांमध्ये मोठ्या प्रमाणावर उत्सुकता होती.
त्रिवेंद्रम विभागाचा उत्कृष्ट कामगिरीचा विक्रम!
यंदाच्या निकालात त्रिवेंद्रम विभागाने ९९.७९% उत्तीर्ण दरासह देशात अव्वल स्थान पटकावले आहे. त्यानंतर विजयवाडा (९९.७९%) आणि बेंगळुरू (९८.९०%) या विभागांनी अनुक्रमे दुसरे आणि तिसरे स्थान मिळवले. चेन्नई (९८.७१%) आणि पुणे (९६.५४%) विभागांनी देखील उल्लेखनीय कामगिरी केली आहे. त्रिवेंद्रमच्या उच्च यशामुळे विद्यार्थ्यांचे कौतुक होत असून, या विभागातील शाळांनी शिक्षणाच्या गुणवत्तेची नवी ओळख निर्माण केली आहे.
निकालाची आकडेवारी आणि विद्यार्थी सहभाग
या वर्षी देशभरातील एकूण २६,६७५ शाळांमधील विद्यार्थ्यांनी सीबीएसई दहावीची परीक्षा दिली. परीक्षेसाठी २३,८५,०७९ विद्यार्थ्यांनी नोंदणी केली होती, त्यापैकी २२,२१,६३६ विद्यार्थी उत्तीर्ण झाले आहेत. विशेष म्हणजे, मागील वर्षाच्या तुलनेत यंदा परीक्षा केंद्रांची संख्या देखील वाढवण्यात आली होती. निकालाच्या तुलनेत यंदा पास होण्याचे प्रमाण लक्षणीयरीत्या वाढले आहे.
निकाल कसा पाहावा?
सीबीएसईचा दहावीचा निकाल पाहण्यासाठी cbse.gov.in या अधिकृत वेबसाईटला भेट द्या. तिथे ‘Results’ या टॅबवर क्लिक करून Class 10 पर्याय निवडा. त्यानंतर, आपला रोल नंबर, शाळेचा नंबर, ऍडमिट कार्ड आयडी आणि जन्मतारीख योग्य प्रकारे भरा. माहिती भरल्यानंतर ‘Submit’ बटणावर क्लिक करा आणि निकाल आपल्या स्क्रीनवर दिसेल. निकालाची प्रत डाउनलोड करून ठेवण्याचा सल्ला देण्यात आला आहे.
डिजिलॉकरमधून मार्कशीट कशी डाउनलोड करावी?
डिजिटल इंडिया उपक्रमाअंतर्गत डिजिलॉकर (DigiLocker) वर देखील विद्यार्थ्यांना आपली मार्कशीट डिजिटल स्वरूपात उपलब्ध होणार आहे. डिजिलॉकर ॲप डाउनलोड केल्यानंतर, आपला आधार कार्ड क्रमांक आणि नोंदणीकृत मोबाईल नंबर टाकून खाते सक्रिय करा. तिथे ‘Central Board of Secondary Education (CBSE)’ पर्याय निवडून, ‘Class 10 Marksheet’ या पर्यायावर क्लिक करा. आपला रोल नंबर आणि इतर माहिती भरल्यानंतर मार्कशीट डाउनलोड करता येईल. डिजिलॉकरवरील मार्कशीट देशभरात कायदेशीरदृष्ट्या मान्य असते.
विभागनिहाय निकालाची टक्केवारी:
सीबीएसई दहावीच्या निकालात त्रिवेंद्रम विभागाने यंदाही आपले अव्वलस्थान कायम ठेवले आहे. ९९.७९% टक्के निकालासह त्रिवेंद्रम विभाग पहिल्या स्थानावर आहे. त्याचबरोबर विजयवाडा विभागाने देखील ९९.७९% टक्के निकाल मिळवत त्रिवेंद्रमसोबत अव्वल स्थान मिळवले आहे.
बेंगळुरूने ९८.९०% टक्के निकालासह तिसरे स्थान प्राप्त केले आहे. चेन्नई विभागाने ९८.७१% टक्के निकालासह आपली कामगिरी उंचावली आहे, तर पुणे विभाग ९६.५४% टक्के निकालासह पुढे आहे. अजमेरने ९५.४४%, दिल्ली पश्चिमने ९५.२४% आणि दिल्ली पूर्वने ९५.०७% टक्के निकाल मिळवला आहे.
उत्तर विभागातील चंदीगड ९३.७१%, पंचकुला ९२.७७%, भोपाळ ९२.७१%, आणि भुवनेश्वर ९२.६४% टक्के निकालासह उत्तम कामगिरी बजावली आहे. बिहारमधील पाटणा ९१.९०% आणि डेहराडून ९१.६०% टक्के निकालासह पुढे आहेत. प्रयागराजने ९१.०१%, नोएडाने ८९.४१% तर गुवाहाटीने ८४.१४% टक्के निकाल नोंदवला आहे. एकूण निकालात त्रिवेंद्रम आणि विजयवाडा या विभागांनी सर्वोच्च कामगिरी करत इतर विभागांना मागे टाकले आहे.
विद्यार्थ्यांसाठी पुढील पाऊल
निकालानंतर विद्यार्थ्यांना गुण पडताळणी, पुनर्मूल्यांकन आणि पुरवणी परीक्षा यांसाठी अर्ज करता येईल. गुणवत्तावाढीसाठी तीन अतिरिक्त संधी उपलब्ध असून, त्यासाठी ऑनलाइन अर्ज प्रक्रिया १४ मेपासून सुरू होणार आहे. अर्ज करण्यासाठी अधिकृत संकेतस्थळाला भेट देण्याचे आवाहन करण्यात आले आहे.
