केंद्रीय अर्थमंत्री निर्मला सीतारामन यांनी सादर केलेल्या केंद्रीय अर्थसंकल्प 2026 मध्ये महिलांच्या आर्थिक सक्षमीकरणासाठी एक मोठी आणि दूरगामी घोषणा केली आहे. ‘लखपति दीदी’ योजनेच्या यशानंतर आता सरकारने महिला उद्योजिकांसाठी ‘सी-मार्ट’ (C-Mart) ही नवी योजना जाहीर केली असून, यामुळे ग्रामीण तसेच शहरी भागातील महिलांना स्वतःचा व्यवसाय उभा करण्यासाठी भक्कम पाठबळ मिळणार आहे. स्वस्त कर्ज, थेट बाजारपेठ आणि ब्रँडिंगची संधी देत ही योजना महिलांच्या उद्योजकतेसाठी गेम-चेंजर ठरण्याची अपेक्षा आहे.
‘सी-मार्ट’ योजनेचा मुख्य उद्देश महिलांनी तयार केलेल्या वस्तूंना योग्य आणि कायमस्वरूपी बाजारपेठ उपलब्ध करून देणे, तसेच त्यांच्या उत्पादनांना एक मजबूत ‘ब्रँड’ ओळख निर्माण करून देणे हा आहे. महिला बचत गटांनी आणि लघुउद्योगांद्वारे उत्पादित केलेल्या वस्तूंच्या विक्रीसाठी ‘सी-मार्ट’ नावाने विशेष विक्री केंद्रे उभारली जाणार असून, व्यवसाय सुरू करण्यासाठी किंवा विस्तारासाठी महिलांना बँकांकडून अत्यंत कमी व्याजदरात कर्ज दिले जाणार आहे. यामुळे महिलांच्या उत्पन्नात स्थिरता येऊन त्यांना आर्थिक स्वातंत्र्य मिळेल.
अर्थमंत्र्यांनी स्पष्ट केले की, हा अर्थसंकल्प शेतकरी, तरुण आणि सामान्य नागरिकांवर केंद्रित असला तरी महिलांचा अर्थव्यवस्थेतील सहभाग वाढवणे हे सरकारचे प्रमुख उद्दिष्ट आहे. ‘लखपति दीदी’ योजनेतून महिलांना आर्थिकदृष्ट्या सक्षम करण्याचा पाया घातला गेला, तर ‘सी-मार्ट’च्या माध्यमातून त्यांच्या उत्पादनांना देशांतर्गतच नव्हे तर जागतिक दर्जाची बाजारपेठ मिळवून दिली जाईल, असे त्यांनी नमूद केले.
या योजनेचा फायदा केवळ आर्थिक मदतीपुरताच मर्यादित राहणार नाही. महिलांना पॅकेजिंग, ब्रँडिंग, मार्केटिंग आणि लॉजिस्टिक्ससारख्या महत्त्वाच्या बाबींमध्येही सरकारी पाठबळ मिळणार आहे. परिणामी, घरगुती उद्योग करणाऱ्या महिला थेट मोठ्या बाजारपेठेशी जोडल्या जातील आणि महिलांचे आर्थिक सक्षमीकरण अधिक वेगाने घडून येईल.
Comments are closed.