बृहन्मुंबई महानगरपालिकेच्या (BMC) घनकचरा व्यवस्थापन विभागात सध्या हजारो पदे रिक्त आहेत. सध्या काम करणाऱ्या कर्मचाऱ्यांवर कामाचा मोठा ताण आहे. मात्र आता या विभागातील सुमारे ५६,００० रिक्त पदे टप्याटप्प्याने भरली जाणार असल्याचे आश्वासन अतिरिक्त आयुक्त डॉ. अश्विनी जोशी यांनी दिले आहे. ही माहिती म्युनिसिपल कर्मचारी कामगार सेनेचे अध्यक्ष बाबा कदम व उपाध्यक्ष डॉ. संजय कांबळे-बापेरकर यांनी दिली.
कर्मचाऱ्यांवरील कामाचा भार होणार कमी!
महानगरपालिका कर्मचाऱ्यांच्या प्रश्नांवर चर्चा करण्यासाठी एक विशेष बैठक डॉ. जोशी यांच्या दालनात पार पडली. या बैठकीत घनकचरा व्यवस्थापन, मलःनिसारण आणि इतर विभागातील रिक्त पदांच्या भरतीवर सखोल चर्चा झाली. कर्मचाऱ्यांवरील कामाचा ताण लवकरच कमी होईल, असं आश्वासन प्रशासनाने दिलं.
लाड-पागे समितीच्या शिफारशीनुसार वारसाहक्काने नोकऱ्या
घाणीशी संबंधित विभागात काम करणाऱ्या मजुरांना आता लाड-पागे समितीच्या शिफारशीनुसार वारसाहक्काने नोकऱ्या दिल्या जाणार आहेत. यामध्ये सफाई, मलःनिसारण, स्मशानभूमी, गटारे अशा विभागातील कामगारांचा समावेश असेल. हा निर्णय अनेक कुटुंबांसाठी दिलासादायक ठरणार आहे.
प्रशासन आणि युनियन यांच्यात सामंजस्य
या बैठकीस उपायुक्त किशोर गांधी, किरण दिघावकर, प्रमुख कामगार अधिकारी सुनिल जांगळे, कर्मचारी अधिकारी शारदा गोसावी, प्रमुख लेखापाल आणि युनियनचे पदाधिकारी महेंद्र पवार आणि मंदार गांवकर हे उपस्थित होते. दोन्ही बाजूंनी सकारात्मक संवाद झाला आणि कर्मचाऱ्यांच्या हितासाठी ठोस पावले उचलण्याचे आश्वासन देण्यात आले.
पी.टी. केस खात्यातील अन्यायकारक व्यवहारावर कारवाई
बैठकीत सफाई विभागातील पी.टी. केस खात्यातील ३ लिपिकांवर तात्काळ बदलीचे आदेश देण्यात आले. या लिपिकांवर कर्मचाऱ्यांची पिळवणूक केल्याचे आरोप होते. याशिवाय केईएम रुग्णालयात २६ वर्षे सेवा दिलेल्या कर्मचाऱ्याची बदली करण्याचेही आदेश देण्यात आले.
कामगार सेनेचा ठाम आग्रह फळाला!
कामगार सेनेने सतत या मुद्द्यांवर आवाज उठवला होता. त्यामुळे अखेर प्रशासनाला निर्णय घ्यावा लागला. ही भरती प्रक्रिया सुरू झाल्यास पालिकेतील घनकचरा व्यवस्थापन अधिक सक्षम होईल आणि नागरिकांना स्वच्छता सेवांचा दर्जा वाढलेला दिसेल.
भरती टप्प्याटप्प्याने – कार्यक्षमतेत वाढ होण्याची शक्यता
५६ हजार पदांची ही भरती टप्प्याटप्प्याने होणार असून, याद्वारे विविध विभागांतील रिक्त पदे भरली जातील. त्यामुळे केवळ कर्मचाऱ्यांचाच नाही, तर संपूर्ण व्यवस्थेचा कार्यक्षमतेवर सकारात्मक परिणाम होईल, असा विश्वास व्यक्त केला जातोय.
निर्णयानंतर कर्मचार्‍यांमध्ये आनंदाचे वातावरण
या घोषणेमुळे महापालिकेतील कर्मचाऱ्यांमध्ये समाधानाचे वातावरण आहे. विशेषतः कामाचा ताण सहन करणाऱ्या कर्मचार्‍यांना आता दिलासा मिळणार आहे. महापालिका प्रशासनाने वेळेवर आणि पारदर्शक भरती केली, तर ही योजना यशस्वी ठरेल, असा विश्वास कर्मचारी संघटनांनी व्यक्त केला आहे.
Comments are closed.