बेळगाव महानगरपालिकेतील १३७ सफाई कामगारांची निवड यादी अखेर जाहीर करण्यात आली आहे. मात्र, ३७ वर्षांवरील उमेदवारांना संधी दिल्याने या भरती प्रक्रियेवर मोठा वाद निर्माण झाला आहे. अनेक तरुण आणि दीर्घकाळ सेवा बजावणाऱ्या कंत्राटी कामगारांना या यादीतून वगळण्यात आल्याने ते संतप्त झाले आहेत. या निवड यादीवर १७ नोव्हेंबर सायं. ५.३० पर्यंत आक्षेप नोंदविण्याची मुदत देण्यात आली आहे.
महापालिकेत मूळतः १४० पदांसाठी भरती जाहीर झाली होती, मात्र प्रत्यक्षात केवळ १३७ उमेदवारांचीच निवड यादी प्रसिद्ध करण्यात आली. उर्वरित तीन पदांबाबत कोणतीही माहिती अद्याप मिळालेली नाही.
या भरती प्रक्रियेत कंत्राटी तत्त्वावर सेवा देणाऱ्या व ऑनलाईन वेतन घेणाऱ्या सफाई कामगारांना प्राधान्य देण्यात आले आहे. तथापि, वयोमर्यादेचा निकष लावल्याने १४-१५ वर्षांपासून काम करणाऱ्या अनेक अनुभवी कामगारांना वगळले गेले आहे. उलट, केवळ ५-६ वर्षांची सेवा असलेल्या, पण वय ३५ ते ३७ वर्षांच्या दरम्यान असणाऱ्यांना निवड मिळाली आहे. त्यामुळे तरुण व अनुभवी कामगारांमध्ये तीव्र नाराजी पसरली आहे.
सध्या राज्यातील दहा महापालिकांना एकूण ३२० सफाई कामगारांच्या नव्या जागा मंजूर झाल्या आहेत. त्यानुसार पुढील काळात ३२ नवीन भरती होणार असल्याची शक्यता आहे. तथापि, अद्याप १४८ ऑनलाईन वेतन घेणारे सफाई कामगार कायम नियुक्तीच्या प्रतीक्षेत आहेत.
दरम्यान, नाराज उमेदवारांनी महापालिका आयुक्त शुभा बी. यांची भेट घेऊन निषेध नोंदवला आहे. त्यांनी ही प्रक्रिया पुन्हा पारदर्शकपणे राबवावी आणि वयोमर्यादा सवलतीत बदल करावा, अशी मागणी केली आहे.
या सर्व घडामोडींमुळे बेळगाव महापालिकेतील सफाई कामगार भरती पुन्हा चर्चेच्या केंद्रस्थानी आली असून, आगामी काही दिवसांत या प्रकरणावर नवे वळण येण्याची शक्यता वर्तवली जात आहे.
Comments are closed.