आयटी क्षेत्रात मंदीचे सावट असताना 2026 मध्ये बँकिंग क्षेत्रातून तरुणांसाठी दिलासादायक बातमी समोर आली आहे. काही काळ सुस्तावलेली भरती प्रक्रिया आता पुन्हा वेगाने सुरू झाली असून खासगी आणि परदेशी बँका नामांकित अभियांत्रिकी व व्यवस्थापन संस्थांमधून थेट कॅम्पस प्लेसमेंट करत आहेत. करिअरच्या शोधात असलेल्या तरुणांसाठी ही मोठी संधी मानली जात आहे.
‘द मिंट’च्या वृत्तानुसार, यंदा बँकिंग क्षेत्रातील भरतीत लक्षणीय वाढ दिसून येत आहे. ICICI Bank, Kotak Mahindra Bank, IDFC First Bank आणि Axis Bank यांसारख्या प्रमुख खासगी बँका कॅम्पस भरतीसाठी सक्रिय झाल्या आहेत. या भरतीत केवळ पारंपरिक पदांवर नव्हे, तर फायनान्स आणि टेक्नॉलॉजी क्षेत्रातील तज्ज्ञ तरुणांना प्राधान्य दिले जात आहे. आकर्षक वेतन पॅकेज देत बँका कुशल उमेदवारांना आपल्याकडे खेचत आहेत.
कोरोनानंतर काही काळ भरती मंदावली होती; मात्र आता कर्जवाटप आणि व्यवसाय विस्तार वाढल्याने बँकांना मोठ्या आणि सक्षम टीमची गरज भासत आहे. Reserve Bank of India च्या आकडेवारीनुसार कर्जवाढीचा दर लक्षणीयरीत्या वाढला आहे. डिजिटल बँकिंग, मोबाईल अॅप्स आणि डेटा-आधारित सेवा वाढल्याने तंत्रज्ञान आणि डेटा हाताळू शकणाऱ्या उमेदवारांची मागणी झपाट्याने वाढत आहे.
त्याचबरोबर Goldman Sachs, JPMorgan Chase आणि Barclays यांसारख्या जागतिक बँकाही भारतात विस्तार करत असून मोठ्या प्रमाणावर भरती करत आहेत. गुंतवणूक सल्ला, जोखीम व्यवस्थापन आणि डिजिटल ऑपरेशन्ससाठी कुशल सल्लागारांची मागणी वाढत आहे.
पूर्वीसारखी केवळ लिपिकीय कामे नव्हे, तर तंत्रज्ञान जाणणारे, गुंतवणूक सल्ला देणारे आणि जोखीम ओळखणारे तज्ज्ञ कर्मचारी बँकांना हवे आहेत. त्यामुळे आयटी आणि मॅनेजमेंट विद्यार्थ्यांसाठी बँकिंग क्षेत्र हे 2026 मध्ये सर्वाधिक आकर्षक आणि स्थिर करिअर पर्याय म्हणून पुढे येत आहे.
Comments are closed.