राज्य सामाईक प्रवेश परीक्षा कक्ष (CET Cell) कडून घेण्यात आलेल्या बी.एड प्रवेश परीक्षेत मोठी गडबड उघडकीस आली असून काही परीक्षा केंद्रांवरील परीक्षा रद्द करण्याची वेळ आली आहे. तांत्रिक बिघाडामुळे नांदेड, परभणी आणि नागपूर येथील केंद्रांवर परीक्षा सुरळीत पार पडू शकली नाही. त्यामुळे या केंद्रांवरील विद्यार्थ्यांची परीक्षा रद्द करण्यात आली असून आता ५ एप्रिल २०२६ रोजी पुनर्परीक्षा घेण्याचा निर्णय CET सेलने घेतला आहे.
या घटनेमुळे CET सेलच्या व्यवस्थापनावर प्रश्नचिन्ह उपस्थित झाले आहे. विशेषतः Parbhani येथील एमजीएम अकॅडमी, Nagpur येथील वैनगंगा अभियांत्रिकी महाविद्यालय आणि नांदेडमधील मराठवाडा ऑनलाइन एक्झाम सेंटर येथे संगणकांमध्ये तांत्रिक अडचणी निर्माण झाल्याने परीक्षा सुरूच होऊ शकली नाही. परिणामी या विद्यार्थ्यांना मोठा त्रास सहन करावा लागला.
यंदाच्या बी.एड CET परीक्षेसाठी सुमारे १ लाख १० हजार ४२ विद्यार्थ्यांनी नोंदणी केली होती. ही परीक्षा २७, २८ आणि २९ मार्च २०२६ या तीन दिवसांत दोन सत्रांमध्ये पार पडली. मात्र काही केंद्रांवरील तांत्रिक बिघाडामुळे परीक्षा रद्द करून पुढे ढकलण्याचा निर्णय घ्यावा लागला.
CET कक्षाने स्पष्ट केले आहे की, पुनर्परीक्षेसाठी विद्यार्थ्यांना नवीन परीक्षा केंद्र, वेळ आणि इतर माहिती नोंदणीकृत ई-मेल व मोबाईलवर पाठवण्यात येईल. तसेच विद्यार्थ्यांनी सुधारित प्रवेशपत्र (Admit Card) लॉगिन आयडीमधून डाउनलोड करावे, असेही आवाहन करण्यात आले आहे.
या सर्व पार्श्वभूमीवर पाहता, बी.एड CET परीक्षेच्या आयोजनात CET सेल अपयशी ठरल्याची भावना विद्यार्थ्यांमध्ये व्यक्त होत आहे. त्यामुळे भविष्यात अशा चुका टाळण्यासाठी अधिक सक्षम यंत्रणा उभारण्याची गरज व्यक्त केली जात आहे.
Comments are closed.