२०२५ या वर्षात जागतिक टेक उद्योगात अभूतपूर्व उलथापालथ पाहायला मिळत असून आर्टिफिशियल इंटेलिजन्स आणि वाढती कार्यक्षमता यामुळे मोठ्या प्रमाणावर नोकरकपात झाली आहे. विविध देशांतील आघाडीच्या टेक कंपन्यांनी एकत्रितपणे सुमारे १ लाख २० हजारांहून अधिक कर्मचाऱ्यांच्या नोकऱ्या संपुष्टात आणल्या आहेत. ही परिस्थिती तात्पुरती नसून, टेक क्षेत्रातील दीर्घकालीन संरचनात्मक बदलांचे स्पष्ट संकेत देत आहे.
चिपमेकर्स, आयटी सर्व्हिसेस, क्लाउड कॉम्प्युटिंग, सॉफ्टवेअर आणि टेलिकॉम अशा जवळपास सर्वच टेक सेक्टरमध्ये कर्मचारी कपात दिसून आली आहे. एआय-आधारित मॉडेल्सचा झपाट्याने स्वीकार, खर्च नियंत्रण आणि ऑपरेशन्सची पुनर्रचना ही यामागची प्रमुख कारणे मानली जात आहेत.
या वर्षी सर्वाधिक नोकरकपात करणाऱ्या कंपन्यांमध्ये इंटेल आघाडीवर राहिली. सेमीकंडक्टर क्षेत्रातील या दिग्गज कंपनीने आर्थिक स्थिरता राखण्यासाठी आणि फाउंड्री-केंद्रित व्यवसाय मॉडेलकडे वळण्यासाठी सुमारे २४,००० कर्मचाऱ्यांची पदे कमी केली. त्यानंतर टाटा कन्सल्टन्सी सर्व्हिसेसचा क्रमांक लागतो. टीसीएसने ‘स्किल मिसमॅच’ आणि एआय-आधारित डिलिव्हरी मॉडेलचा वेगाने स्वीकार यामुळे जवळपास २०,००० कर्मचाऱ्यांची कपात केली.
खर्चात बचत आणि ऑपरेशन्सची पुनर्रचना करताना व्हेरायझनने सुमारे १५,००० कर्मचाऱ्यांच्या नोकऱ्या कमी केल्या. ॲमेझॉनने संघटनात्मक रचना सुलभ करण्यासाठी सुमारे १४,००० व्यवस्थापन आणि प्रशासकीय पदे संपुष्टात आणली, तर डेल टेक्नॉलॉजीजने एआय-ऑप्टिमाइझ्ड हार्डवेअरवर लक्ष केंद्रित करताना सुमारे १२,००० नोकऱ्यांना कात्री लावली.
कन्सल्टन्सी क्षेत्रातही याचा मोठा परिणाम दिसून आला. जनरेटिव्ह एआय प्रकल्पांकडे ग्राहकांचा कल वाढल्याने ॲक्सेंचरमध्ये सुमारे ११,००० कर्मचाऱ्यांची कपात झाली. सॉफ्टवेअर आणि क्लाउड क्षेत्रात एसएपीने संसाधनांची पुनर्रचना करत १०,००० पदे कमी करण्याची घोषणा केली, तर मायक्रोसॉफ्टने गेमिंग आणि ॲझ्युर विभागांसह सुमारे ९,००० कर्मचाऱ्यांच्या नोकऱ्या कमी केल्या असून कंपनीचा भर दीर्घकालीन एआय इन्फ्रास्ट्रक्चर गुंतवणुकीवर आहे.
याशिवाय, तोशिबाने खासगीकरणानंतरच्या पुनर्रचनेत ५,००० पदे कमी केली, तर सिस्कोने सायबर सिक्युरिटी आणि एआय डेव्हलपमेंटकडे खर्च वळवण्यासाठी सुमारे ४,२५० कर्मचाऱ्यांची कपात केली आहे.
या सर्व आकडेवारीवरून एक गोष्ट स्पष्ट होते की टेक कंपन्या आता अधिक कार्यक्षम, खर्चकपात करणाऱ्या आणि ‘एआय-सज्ज’ होण्याच्या दिशेने वेगाने वाटचाल करत आहेत. याचा थेट परिणाम जागतिक नोकरी बाजारावर होत असून, पारंपरिक भूमिकांची जागा हळूहळू स्वयंचलित आणि कृत्रिम बुद्धिमत्तेवर आधारित प्रणाली घेत असल्याचे स्पष्टपणे दिसून येत आहे.
Comments are closed.