अग्निवीर बनण्याचं स्वप्न पाहणाऱ्या तरुणांसाठी मोठी खुशखबर आहे. भारतीय थल सेनेनं पुढील वर्षांपासून अग्निवीर भरतीचं प्रमाण प्रचंड वाढवण्याचा निर्णय घेतलाय. सध्याच्या तुलनेत जवळपास दुपटीने भरती होणार असून, दरवर्षी तब्बल १ लाख नवे अग्निवीर सैन्यात दाखल केले जाणार आहेत.
कोरोना काळात दोन वर्षे भरती प्रक्रिया थांबली असल्याने आणि दरवर्षी हजारो सैनिक निवृत्त होत असल्याने लष्करात मोठी पोकळी निर्माण झाली होती. सध्या पायदळात जवळपास १.८ लाख सैनिकांची कमतरता आहे. ही भर निघावी म्हणून भरतीचा मोठा रोडमॅप तयार करण्यात आला आहे.
२०२२ मध्ये केवळ ४० हजार अग्निवीरांची भरती झाली होती, पण आता ही संख्या तब्बल अडीचपट वाढणार आहे. यासाठी प्रशिक्षण केंद्रांची क्षमता वाढवण्याचंही नियोजन आहे, ज्यामुळे एकाच वेळी अधिक तरुणांना उच्च दर्जाचं प्रशिक्षण देता येणार आहे.
भारतीय लष्करातील वरिष्ठ अधिकाऱ्यांचं स्पष्ट मत आहे की,“जितकी कमतरता आहे तितकंच भरती होईल, पण प्रशिक्षणाचा दर्जा कधीही कमी होऊ दिला जाणार नाही.”
यामुळे सैन्यात करिअर करू इच्छिणाऱ्या तरुणांसाठी रोजगार + राष्ट्रसेवा अशी दुहेरी संधी निर्माण झाली आहे.
Comments are closed.