नागपूर, २२ जुलै – सरकारानं चार महिन्यांपूर्वी ठरवलं होतं की ज्या बायकांच्या घरात चारचाकी आहे, त्यांची चौकशी करायची आणि योग्य वाटल्यास नावं योजनेतून कमी करायची.
महिला व बालकल्याण विभागाला आदेशही दिले गेले. पण चौकशी न करताच नागपूर जिल्ह्यातल्या तब्बल १६ हजार ८६८ लाडक्या बहिणींचं नाव योजनेतून वगळण्यात आलंय.
‘मुख्यमंत्री माझी लाडकी बहीण’ या योजनेमुळे निवडणुकीआधी सरकारला चांगला प्रतिसाद मिळाला. पण आता त्या बहिणींचं समाधान राखणं सरकारला जड जातंय. सुरुवातीला निराधार योजना घेत असलेल्या महिलांची नावं वगळली गेली. मग सरकारी नोकर असलेल्या घरांमधल्या महिलांची नावं काढली.
आता तर चारचाकी वाहन असलेल्या घरांतील महिलांचंही नाव काढायला सुरुवात झालीय. पण आरटीओकडून यादी घेतली खरी, पण त्यावर नीट सर्व्हे न करताच थेट नावं कमी केली गेलीत.
जिल्हा महिला व बालविकास अधिकारी रणजित कुन्हे यांनीही सांगितलं की सर्व्हेक्षणाचं काम अर्धवटच राहिलं कारण माहितीच मिळाली नाही. पण त्यामुळंच या १६ हजार बहिणी अन्यायानं योजनेबाहेर फेकल्या गेल्या.
Comments are closed.